PGL – A Associaçom Galega da Língua (AGAL) estará presente na ediçom do Cultural mais virada para a Lusofonia, de 26 a 28 de novembro. A presença da entidade reintegracionista será mediante duas marcas criadas neste ano, a ATRAVÉS|EDITORA e a loja Imperdível, ambas apostas estratégicas da associaçom.
Mercê a estes dous projetos complementares, agora realidades consolidadas, o público que se aproximar ao stand agálico poderá conhecer de primeira mão as novidades editoriais, assinadas por poderosos nomes como os de Carlos Taibo, Ugia Pedreira, ou Séchu Sende, sem esquecer a pertinente olhada a clássicos como Castelão, ou ao magnífico trabalho da Comissom Lingüística da AGAL.
Um programa cheio de atividades
Culturgal 2010 oferecerá três dias de intensa atividade os dias 26, 27 e 28 no Paço da Cultura de Ponte Vedra, todas elas, de acesso livre e gratuito. Destacam os dias 26 e 27 o Foro Criativa, encontro multidisciplinar sobre as indústrias culturais na Galiza, Brasil e Portugal; a atuaçom dos brasileiros Érika Machado e Kiko Klaus a dia 26, à par do humorista Carlos Blanco; ou o concerto do sábado com os portugueses Deolinda a partilharem cenário com o gaiteiro Xosé Manuel Budiño.
Da organizaçom assinalam que o diálogo da cultura galega com a do Brasil e Portugal «protagonizará duas das três noites estelares do Culturgal, os foros de debate profissional e estará presente durante toda a feira». Essas noites estelares som a Galiza.Br e a Galiza.pt.
Galiza.Br
A noite da sexta-feira, dia 26, às 21h terá lugar no Auditório do Paço da Cultura um «estimulante intercâmbio artístico entre o Brasil e a Galiza», indica a organizaçom. De um lado, dous artistas revelaçom de Minas Gerais: Érika Machado e Kiko Klaus. Do outro, o novo espetáculo do conhecido humorista galego Carlos Blanco, «Ordem e Progresso», umha olhadela ao Brasil acompanhada da cadência do pandeiro e do cavaquinho do Sérgio Tannus Trio.
Galiza.Pt
Ao dia seguinte, à mesma hora e no mesmo lugar, poderá-se desfrutar de umha oportunidade única. Duas das propostas musicais mais exitosas desta e da outra beira do Minho partilham palco em exclusiva para o público do Culturgal. Deolinda é um grupo formado por quatro jovens que saltam todos os clixés do fado: nom usam guitarra portuguesa, fazem música para dançar e a sua cantora, Ana Bacalhau, veste roupas coloridas. Recentemente apresentárom o disco Dois selos e um carimbo, com o qual estám a causar sensaçom em Portugal. No cenário acompanharám Xosé Manuel Budiño, que visita Culturgal com o seu último projeto, Volta.
Localizaçom do stand da AGAL no Culturgal
[prima aqui para alargar a imagem, ou confira o ficheiro PDF abaixo]
+ Ligações relacionadas: